Quantcast
Channel: Fundición Princesa de Astucias » Ruma Barbero
Viewing all articles
Browse latest Browse all 15

Enllazando

0
0

(Analís del informativu d’Antena 3 del 22 de febreru de 2015 a les 15.00 h.)

Va tiempu que quedé ensin tele, nun foi una cosa planeao, nun foi una decisión premeditao, nun foi una heroicidá. Una nueche nun fui quién a prendela y pasó a ocupar un cachín del antepar del pisu, casi un añu, enantes d’acabar nel puntu verde de Roces tres de pasar pela antoxana del de la Feria Muestres, peslláu neses feches por mor de la pitanza agostera.
En verdá, diba tiempu yá que nun mos facíemos munchu casu, la cacharra andaba esgonciada enforma, tardaba en prender y salíen-y unes rayuques con mui mala traza.

Llevaba munchos años con alifaces, achaquinos que foron faciéndola morrer a poquinos, al empar que’l mio interés por ella foi diendo puñinín a poco a menos. L’últimu par de llustros seique namás la prendía, con puntualidá británica, a la hora xintar, pa ver n’Antena 3 la milenta reposición d’un capítulu de los Simpsons y apigazar, selemente al son del segundu d’ellos. Tenía el procuru de pone-y un volume floxu pa nun esconsoñar de sópitu coles fanfarriones sensacionalistes de los informativos de la cadena, que siguíen darréu.

Nesta dómina post-tele, fui garrando otros vezos. Lo más normal ye que-y eche un güeyu al programa del Wyoming de la nueche anterior pel ordenador, por eso de dexar per un cachín el mio trogloditismu aisllacionista de les noticies teledirixíes. Pero ayer, yera domingu y nun tenía Intermediu del Monzón qu’echar a los güeyos, asina que busqué onde ver la tercer canal española en directo, yá que na web oficial fainte dar más vueltes qu’un perru pa echase. Vi un capítulu a medies de los springfiliegos, otru enteru y de la que taba a un tris de durmir ¡Rias! la fanfarriona esa que ponen que paez que pasó daqué. Tres d’esos segundinos de sustu, apaeció un sumariu cola voz “engolada” de Matías Prats anunciándonos unes supuestes noticies, lo mesmo que t’enchufa la cuenta nómina del ING, pa darréu apaecer él mesmu, de cuerpu presente acompañáu d’una rapaza, vamos dicir “jacksoniana”. Seguro que vos dais cuenta d’ella, ¡ho!. Una moza con cara ente lifting y plasmu, que tien unes ñarres que tal paez que-y les operó’l mesmu albeitre que-y fixere lo que-y fexo a Michael Jackson, más les mexelles de Bunbury de regalu. Lo primero no que fixé, ye qu’agora nun tienen una mísera tayuela de catar onde se sentar, anden pel plató como cencerru ensin mayuelu, a lo xó, detrás de les imáxenes qu’apaecen nunes pantallones qu’hai al so llombu, y entós… vieno lo meyor. Un exemplu pa poner en clase de teoría de la imaxe, si ye que queda dalgún institutu que dea tovía esta materia tres de la frada de les lleis socialistes y el xunami’l ministru con apellíu de rutiu, qu’anguaño ta dexando ermu d’asignatures de pensar el curriculum de secundaria.

L’orde de les noticies foi la que sigue:

1ª -Apaeció Floriano, qu’a la vsita ta, tien más focicu qu’un balagar de sellos de Carmen de Mairena, falando nun mitín de la cosa de Monedero coles perres de Venezuela. Gustándose, ¿sabéis cómo vos digo?, insinuando graciosón qu’igual eses perres foron pa financiar illegalmente al partíu de Pablo, pero col procuru de que les sos palabres namás raspiaren la Illegalidá, col envís de nun acabar sentáu delantre’l xuez Ruz acompañando a los tres últimos tesoreros de la magaya xenovesa.

2ª -Enllacen, ensin dar respiru, con una encuesta de La Razón, la fueya parroquial del “poblachón manchego” que dicía Umbral, na que concluyen que la mayoría de los subditos camienten qu’un gobiernu de Podemos desestabilizaría España, como si la milenaria pelleya de güe pisara tarucos. Y dan númberos. El 61% contesta que nun los va votar, un 44% camienta que’l chavismu-y da la paguina al partíu de los profes de la Complu y un 61% de los encuestaos cree qu’en Podemos hai corruptos.

3ª -Por si nun-y quedaba claru l’asuntu al probe espectador, apaez el “ninot” de la banca holandesa dando la tercer noticia, la detención del alcalde de Caraques. Nesti casu, planu mediu, pa solliñar el drama y qu’asina de pasu rescample bien la imaxe qu’ilustraba la noticia, un primer planu de Tsipras a tamañu descomanáu. Sí amiguinos, nun m’equivoco y lo más gordo ye qu’ellos tampoco nun tracamundiaron una imaxe con otra. Más panchos que Villa’l del Soma, pero ensin “síndrome confusional”, llantaron una semeya’l presidente griegu pa falar de la falta de llibertaes en Venezuela.

4ª -La cuarta d’esta riestra d’avisu a votantes, foi’l fracasu de Varoufakis na rula económica del parlamentu européu. Cómo fracasó’l mastín de l’Acrópolis énte la razón de los qu’amagüesten les perres en Bruseles, cómo los griegos tan yá fartucos de Syriza dos selmanes depués de les elecciones del país helenu, cómo esi nun ye’l camín.

Too perfectamente texío, enguedeyao, empatando una noticia con otra con intelixencia foina pa dicinos qué ye lo que pasa cuando nun yes buenín, cuando nun comes de la mano d’ellos, cuando cagues en ñeru. Pero fainlo tan mal, vénse-yos tanto les cordures (y nun toi falando de Matías agora), qu’hasta un pintamones como yo, ye quién a decatase de que l’emperaor va desnudu y ye que fainlo tan mal porque tienen mieu, ¡munchu mieu!, como cantaba Lola Flores.


Viewing all articles
Browse latest Browse all 15

Latest Images

Trending Articles





Latest Images